Farishtalar kirmaydigan uy

Rosululloh -sallallohu alayhi vasallam- shunday marhamat qildilar: «Farishtalar it va surat bor uyga kirmaydi». (Buxoriy rivoyat qilgan). Mana shuning uchun it boqish mumkin emas, faqat qo’riqchilik kabi qattiq zarurat bo’lganda boqish mumkin bo’ladi. Jabroil -alayhis-salom- Rosululloh sallallohu alayhi vasallam-ga bir vaqt kelmoqni vada qilgan ekanlar.

O’sha vaqt bo’lipti-yu, Jabroil -alayhis-salom- kelmapdilar. Shunda Rosululloh -sallallohu alayhi va sallam- qo’llaridagi asoni tashlab: “Alloh xam uning elchilari xam vadasiga xilof qilmaydi”, – dedilar. Atrofni tekshirib ko’rib, yotadigan o’rinlari ostida bir kuchukchani ko’rib qoldilar. “Ey Oysha, bu it qachon kirdi?” – deb so’radilar. Oysha -roziyallohu anha-: “Allohga qasamki, bilmadim”, – dedilar. Rosululloh -sallallohu alayhi vasallam- itni chiqarib tashlashga buyurdilar.

It chiqarib tashlangandan keyin Jabroil -alayhis-salom- keldilar. Rosululloh sallallohu alayhi vasallam-: “Vada qildingiz, men sizni kutib o’tirdim, nega kelmadingiz?” – dedilar. Jabroil -alayhis-salom-: “Uyingizdagi it meni (uyingizga kirishdan) man qildi. Biz (farishta)lar it va surat bor uyga kirmaymiz”, – dedi. (Muslim rivoyat qilgan).